Кули близначки во Париз

Во 2016 година, Градот на Светлината ќе добие “кули близначки”. Се работи за проектот на компанијата “Фостер и партнери“, изработен под диригентската палка на познатиот архитект Сер Норман Фостер, а инвеститор е француската компанија Ермитаж. Двата облакодери ќе никнат во бизнис регионот на Париз, La Defense, ќе бидат со висина 337 метри и со своите 94 катови ќе претставуваат највисок повеќенаменски објект во Западна Европа. Реализацијата на овој проект, наречен Hermitage Plaza ќе започне во текот на 2012 година, ќе трае 4 години и ќе ја чини компанијата 2.500.000.000 евра.

“Hermitage Plaza ќе создаде нова заедница на источната страна на La Defense, притоа пренесувајќи го начинот на живот од Централен Париз во новиот бизнис регион, со паркот и наредените кафулиња и ресторани предвидени покрај реката Сена.” – објаснуваат од компанијата “Фостер и партнери”.

При дизајнирањето на облакодерите големо внимание е посветено на самоодржливоста како концепт и можните начини на кои може да се заштеди и искористи енергијата, со што ова здание ќе биде добие на значење не само со својата грандиозност, туку и со еколошкиот аспект – минимално загадување и максимално искористени природни ресурси на енергија.

Содржината по катови на двете кули најдобро може да се согледа од прикажаната скица. Најголем дел од катовите се предвидени за домување, во една од кулите во долната зона е предвиден хотел, додека во другата во истиот висински појас има канцеларии. И во двете кули се предвидени репрезентативни влезови со големо лоби и рецепција, а неколку катови од двете кули се резервирани за спа центри, во чиј состав се неколку фитнес клубови, сауни, базени и останати wellness задоволства.

Погледајте дел од објавените 3Д прикази на официјалната веб страница на Hermitage Plaza, од ентериерот и екстериерот на идните кули близначки.