Важноста на појадокот

Појадокот е крал на оброците и во никој случај не смеете да го прескокнувате. Покрај тоа, појадокот ни дава енергија, влијае врз намалување на телесната тежина, спречува дијабетес, придонесува за подобро функционирање на умот и телото и го намалува апетитот во текот на денот. Сепак околу 50% од луѓето го прескокнуваат појадокот. Правилно балансиран појадок е „гориво“ за нашето тело. Како таков, појадокот ни дава енергија, овозможува да бидеме поактивни, продуктивни и расположени во текот на денот, а на долг рок носи огромна корист за целото тело. Луѓето кои го пропуштаат појадокот се чувствуваат уморни, немирни и нервозни.

Прескокнувањето на појадокот претставува непотребно изгладнување на организмот, со што се спречува неговото правилно функционирање. Анкетите покажуваат дека повеќето луѓе се свесни за важноста на појадокот, но поради недостаток на време често се принудени да го прескокнат. Факт е дека постојаното забрзување на темпото на живот ни остава сè помалку слободно време. Сепак, секогаш мора да постои начин да се најде време за нештата кои живот значат. Ако наутро станувате само дваесетина минути порано ќе си обезбедите многу поздрав почеток на денот. Како што повеќето од нас секогаш наоѓаат време за кафе и цигара, така може да најдат време и за појадок. Втора најчеста причина за прескокнување на појадокот е желбата за намалување на телесната тежина. Оние кои постојано се на диета, прескокнувајќи го појадокот сакаат да ја намалат дневната количина на внесување калории, не сфаќајќи дека неговото избегнување е една од причините за зголемување на телесната тежина.

Поврзаноста помеѓу појадокот и здравјето

Некои луѓе дозволуваат од времето на вечера до следниот оброк да поминат повеќе од 16 часа. Таквите навики во исхраната може да предизвикаат вртоглавици, замор и безволност. Токму затоа, треба да се погрижиме за своите енергетски потреби веднаш по будењето. Гликозата (шеќер во крвта) е потребна за нормално функционирање на телото. Таа снабдува со енергија повеќе активности: движење, зборување, пишување и друго. Појадокот е првата можност за зголемување на нивото на гликоза во крвта после повеќе часовно гладување. Гликозата е важна и за мозокот и за мускулите бидејќи претставува главен извор на енергија. Кога спиеме од 7-9 часа, нашето тело треба да се „опорави“ од тој период на глад. Прескокнувањето на појадокот го задржува телото во состојба на глад, а неактивноста го забавува метаболизмот. Ако сакате да ја намалите телесната тежина, бавниот метаболизам сигурно не ви е од корист. Затоа, квалитетниот утрински оброк е идеален за повторна работа на метаболизмот и оспособување на организмот за согорување на масти.

Ефект на појадокот врз виткоста

Избегнувањето на појадокот го намалува шеќерот во крвта. Тоа не само што го попречува нормалното функционирање на организмот и го нарушува здравјето, туку и ги поттикнува луѓето да посегнат по едноставни шеќери како колачи, чоколади, газирани сокови. Од друга страна, добро балансираниот утрински оброк ќе создаде долготрајно чувство на ситост и ќе ја намали потребата за „грицкање“ меѓу оброците. На тој начин се намалува целокупниот внес на калории. Освен целосното прескокнување на појадокот, погрешно е и ако јадете само малку наутро. Така многу брзо ќе се спушти нивото на шеќерот во крвта и повторно ќе почувствуваме глад.
Правилното и рамномерно снабдување на организмот со потребните хранливи материи го стимулира и нормализирањето на хормоналните процеси кои учествуваат во регулирање на расположението.

Што покажуваат истражувањата?

– Луѓето кои појадуваат редовно и правилно, ретко страдаат од недостаток на железо и калциум, а на тој начин имаат помал ризик од анемија, остеопороза, расипување на забите и заболување на непцата.
– Луѓето кои појадуваат сложени јаглехидрати, имаат помалку апетит во текот на денот и многу ретко страдаат од дебелина.
– Луѓето кои не појадуваат редовно, послабо функционираат во утринските часови и имаат помалку успех во решавањето на поставените задачи. Прескокнувањето на појадокот има сличен ефект врз вербалната способност, креативност и способност за здобивање со нови знаења.
– Некои научни студии го потврдуваат позитивното влијание на појадокот во спречувањето на грип и зајакнување на имунитетот.
– Девојките кои не појадуваат имаат многу почести ментруални болки од оние кои појадуваат редовно.
– Луѓето кои не појадуваат имаат тенденција да добијат хронична тврда столица (опстипација).