Светулки

Недоречените зборови
и светулките што
ги држам на рацеве
на круговите им запооведаа
да ме водат кон извориштето,
да ме предадат на светлините,
да не молам со превезот на очиве
барајќи те низ темнините.

Како грутка неделива,
сепак лесна за делкање
и толку камена за гризање,
краевите со правот те опиваа.
Истолчен си.

Јас сништа држам на рацеве.
Сништа натежнати од нерастворливите бои,
оти и други светулки сега товарив на нив –
не се леат светлините.

Ги хранам милувањата со светулки.
Светулки ситни,
гневни,
од инает недојадени,
пред да се родат – изделкани.

Еј љубов,
сакам неправилни облици.

Доколку пишувате проза или поезија и сакате да ја објавите на iLike.mk контактирајте не на contact@ilike.mk | Автор на “Светулки“: Мануела Златкова

Станете наш facebook фан.