Трагајќи по добрата страна од животот…

Некогаш, повеќе од случајно нерамниот пат прави да го мразиш животот, кога не можеш да се бориш за оној кој го сакаш, кога не можеш да бидеш личноста која си ја замислувал, кога не можеш да живееш живот каков што си посакувал. Но, сето ова треба да претставува најмала наша грижа.

Проклет да е овој живот, кога има луѓе кои не знаат дали утре воопшто ќе се разбудат. Кога има луѓе чии очи се толку крвави па страв ти е да ги погледнеш, не зошто се плашиш од нив, туку зошто се плашиш дека тие во твоите очи ќе го видат проклетото сожалување.

Што овој живот воопшто претставува кога има деца кои не си ги знаат своите родени мајка и татко, кога постојат болни деца кои се без никаква надеж за подобро утре и кога тебе ти преостанува се тоа да го гледаш и поднесуваш? Што е суштината на животот и зошто сите се бориме? Зошто сите трчаме, каде одиме и зошто често тагуваме? Дали знаеме што значи да бидеш нем, глув или слеп, па и покрај тоа да имаш волја за живот?

Дали луѓето знаат дека треба да живеат од ден за ден и дали тоа не е само уште една излитена фраза, туку истото и го применуваат? Дали некој од нас може да претпостави што ќе стане со него утре? Зошто сите брзаме кога живееме, зошто се однесуваме како ова да е малку вредно, зошто вртиме грб на некој кој бара наша помош, зошто имаме милион прашања, а немаме ниту еден одговор?!

Ова звучи премногу депримирачки, но на моменти, таков е и цел овој пат.

Често употребувам најразлични видови на пцовки и навреди кон ова нешто кое го нарекуваме живот. Животот е кучка, за некого бескрајно свиреп, за некого беспрекорно убав. Нефер, недостоен, понекогаш невреден… но, во сите крајни случаи исполнителен. Им се восхитувам на луѓето кои и покрај огромни бодежи во животот, продолжуваат понатаму, кои се трудат да не го вртат својот поглед назад. Им се восхитувам на тие луѓе кои носат болка во душата, а сепак имаат сила барем за една искрена насмевка… тие се неверојатни и ја доловуваат вистинската смисла на добрата страна од животот!

Доколку пишувате проза или поезија и сакате да ја објавите на iLike.mk контактирајте не на contact@ilike.mk | Автор на “Трагајќи по добрата страна од животот…“: Наташа Петровиќ

Станете наш facebook фан.