“Ми се јави Хана”

Јас и Конор одевме околу месец и иако се знаевме одамна, сеуште само се запознававме. Уште од првите денови на нашата врска знаев за една негова другарка по име Хана која се јавуваше многу често. Ако на пример со Конор се гледавме по два пати дневно, таа се јавуваше бар еднаш на секое наше гледање и во просек би испаднало дека тие се слушаа околу 5 пати дневно. Тоа не ми сметаше воопшто. Напротив, мило ми беше што Конор толку си ги цени своите поранешни колеги. Нивните разговори секогаш беа многу интересни за слушање и можеше да се заклучи дека тие навистина се многу блиски. Иако Хана се разведуваше, таа сепак имаше дете и беше неколку години постара од Конор. Му беше пријателка и за мене не претставуваше ама баш никаков проблем. Сė до еден ден.

Хана е убава, русокоса, малку пуничка девојка. Нејзината насмевка совршено ги покрива сите нејзини негативни животни предизвици. Но, јас за нив не бев виновна и сè што понатаму се случи го сфатив лично. Еден ден таа како и сите претходни, се јави на Конор, промрморе нешто и веднаш спушти. Конор со насмевка ја проследи нејзината постапка, чудејќи се на истата. Знаејќи дека тој и бил рамо за плачење долго време на оваа девојка, му го кажав на Конор моето мислење. Од сè што дотогаш се случуваше, извлеков заклучок дека таа е вљубена во него. Истиот ден и Конор ми го потврди истото, откако јас го натерав да ѝ се јави и да види што е проблемот. Но Конор не знаеше зошто Хана би се вљубила во него, бидејќи беше сигурен дека не дал никаков повод за да ја испровоцира нејзината приврзаност кон него. Му објаснив дека ние девојките сме такви, за нас не требаат причини, ние лесно се вљубуваме во добрите момци како него. Го охрабрив да продолжи да ѝ се јавува, иако таа го избриша и од фамозниот фејсбук.

Откако Хана виде дека не може без Конор во животот, продолжи со јавувањата и повторно стана пријателка со него на фејсбук. Но, јавувањата овојпат зачестија, беа зачинети со повеќе спуштања кога јас бев во близина, смешни папучарски изрази наменети кон Конор, јавувања околу полноќ и други такви минорни работи. Сè тоа почна да ми смета и нервира, а Конор не го сфати тоа ни дури откако ја имавме и првата караница поврзана со Хана. Една вечер, по веќе неколку неуспешни обиди да извлечам нешто повеќе од Конор за неговата врска со Хана, тој призна. Со Хана имале нешто повеќе од пријателство, тие имале односи во минатото. Свесна бев дека сите имаме некакво минато, но важен е начинот на кој ќе се справиш со истото. А мене не ми се мешаа моите бивши, јас немав што да лажам, иако сокрив некои работи за да не ги компликувам работите, мојата искреност секогаш беше на еден начин проклета. Откако му дадов друга шанса на Конор, иако веќе не можев да му верувам, тој сеуште не превзеде ништо во врска со Хана. Секогаш кога таа ќе се јавеше, зборовите: “Ми се јави Хана“, одsвонуваа во мојата глава. Во бунилото на расипаната мрежа на телефонот, тие дури и да не се слушаа. Секој пат барав да бидат повторени и веднаш ме обземаше чудно чувство на превртување на абдоменот.

Ова не беше уште една женска илузија, полека сите коцки паѓаа на свое место и работите стануваа се појасни. Сè претходно ќе беше прифатливо и лесно за голтање ако го немаше “релевантниот” факт. Тој целосно ги смени работите. Што навистина се случувало во периодот кога беа чудните спуштања и сė тоа што следеше? Побарав од Конор веќе еднаш да ја заврши таа приказна ако сака да ме зачува, бидејќи ова веќе стана лично. Хана ме провоцираше на социјална мрежа, мислејќи дека е многу поважна од мене. Иако Конор не сакаше да ѝ каже да не се јавува, јас го натерав. Тој сега иако ништо ми нема речено, заклучив дека ме прекорува за губењето на една важна пријателка од неговиот живот. Невино, неистакнувачки, ме тера да се чувствувам виновна за нејзината судбина, за сè што таа има поминато. Конор не го сфаќа неговото однесување како лошо, тој смета дека претерав и се плаши од помислата дека Хана веќе нема да сака да го види. А, мојата наивност паѓа на тоа. Сега буквално сè поврзувам со Хана, таа тоа не го ни знае, а без причина стана многу важен дел од мојот живот. За човек кој не презирал никого во животот, презирот е многу силна и самоуништувачка работа. Токму поради тоа, овој текст е во нејзина чест.

Доколку пишувате проза или поезија и сакате да ја објавите на iLike.mk контактирајте не на contact@ilike.mk | Автор на “Ми се јави Хана“: Алиша М.

Станете наш facebook фан.