Кога би пишувал за неа, би застанал овде. На првата реченица. Се присетувам на стотина прочитани книги и наслови кои не го носеа нејзиното име. Реченици кои никогаш не беа напишани за неа. Неа не може да ја опишат нити врвните писателски раце. Таа беше родена за никој да не може да ја создаде во зборови. Нити една слика на која беше насликана не ја даваше сета онаа енергија која излегуваше од нејзиниот очи. Очите и душата се едно. Кога и погледнав во очите во нив ја имаше најголемата среќа, а кога го задлабочив мојот поглед во нив, во нејзината душа ја имаше најголемата тага. Таму за прв пат ја здогледав љубовта. Во нејзините очи. Мојата љубов. Ако еден човек љуби, за некој можеби тоа нема да биде љубов туку само проклето сакање. Секогаш правев разлика помеѓу тие два збора. Никогаш не можеа да го имаат истото значење за мене. Таа секогаш беше различна. Оние кои ги љубиме секогаш се посебни за нас, различни од сите други. Денес ја гледам само нејзината слика. Истата слика која веќе ја гледам подолго време, но никогаш не почувствував мачнина во моите очи гледајќи го тоа исто лице. Оние кои ги љубиме никогаш не можат да ни останат исти и досадни во нашите очи. Тие секогаш неуморливо беа спремни да ја гледаат само неа. Цел мој свет беше собран во еден поглед кон една жена. Свет полн љубов и воздишки и по некоја солза. И љубовта е вредна за плачење. Неколку солзи од радост. Од она чувство во нас кое не исполнува како ништо друго кое го има на овој свет. Само таа останува вечна. После сите оние нешта низ кое ќе помине еден живот, таа останува засекогаш. Истата љубов, за истата таа жена. И не пишував за неа, туку за мене. Затоа што и никогаш нема да знам како да ја опишам. Со кои зборови да ја опишам онаа која секогаш ќе ја љубам. Совршена. Нити тој збор не ја прикажува целосно нејзината слика покрај мојот кревет. Залудно е. Останав без вистински текст за неа, со мојот крик на ранет лав, полн со љубов!
Доколку пишувате проза или поезија и сакате да ја објавите на iLike.mk контактирајте не на contact@ilike.mk | Автор на “Без наслов за неа“: Миле Трајкоски
Станете наш facebook фан.
Станете наш facebook фан. Ви Благодариме!