Како резултат на интензивното темпо кое го диктира 21-от век, сè повеќе се соочувате со фактот дека слободното време станува луксуз, кој не секогаш можете да си го дозволите. Во контекст на тоа сигурно сте читале многу статии – нудат одреден број на совети кои ќе ви го олеснат животот, но не сè што е напишано баш така лесно можете да го примените во вашето секојдневие, нели? И не можете така драстично да влијаете на темпото на својот живот, бидејќи да бидеме реални, ништо не се случува преку ноќ и тоа не зависи секогаш од вас.
Овој текст нема за цел да ви го промени животот. Ова е само една збирка мали корисни совети кои кружат низ интернет сајтовите, како повеќе или помалку познати т.н. “life hacks” (животни трикови). Нивната убавина е тоа што се креирани од обични луѓе, а нивната примена е лесна бидејќи се однесуваат на ситуации од секојдневието. Ги има многу, а ние за вас ги издвоивме најинтересните:
1. Завртете ги закачалките. Во вашиот плакар сигурно имате облека која не ја носите, без разлика дали за тоа сте свесни или не, ама од различни причини таа сеуште стои таму, визуелно пополнувајќи место. Направете го следното: за почеток сите закачалки свртете ги на иста страна (на пример во десно), а секогаш кога ќе облечете нешто, при неговото враќање во плакарот, свртете му ја закачалката обратно (во нашиот пример – во лево). На крајот на сезоната (или крајот на годината) ќе знаете точно што сте носеле, а што воопшто не било облечено.
2. Излезете од дома навреме. За да не доцните сабајле, еве еден интересен совет. Направете си плеј-листа, со временска должина точно колку што ви е потребно за да сте спремни. Песните нека имаат своевидна градација – од посмирени кон поенергични. Така, ќе знаете секојдневно до која фаза на спремањето сте и дали доцните, базирајќи се на моменталната мелодија која ја слушате.
3. Ледено ладен пијалок. Доколку сте заборавиле сокот или пивото да го ставите во фрижидер, а сакате да имате ледено ладен пијалок за неколку минути пробајте го следното: ставете ја амбалажата во сад со мраз, додадете 2 лажици сол и додадете вода за да наполни садот. За 3 минути ќе го добиете истиот ефект како пијалок кој цел ден бил во фрижидер.
4. Стопирајте т.н. “brain freeze”. Kога јадете сладолед или пиете ледено ладен пијалок брзо, скоро секогаш се случува да почувствувате силна болка во пределот на главата, поточно во делот каде поминуваат синусите. За да ја спречите моментално оваа непријатна појава, со јазикот силно притиснете го непцето на горната вилица. Болката ќе исчезне за миг. Истото можете да го примените и во ситуација кога ве болат слепоочниците.
5. Кивнете брзо. Доколку имате нагон за кивање, меѓутоа останувате заглавени во моментот на “земање залет”, свртете го погледот кон силна светлина (сонце, светилка итн..) и веднаш ќе кивнете, притоа избегнувајќи го незгодното скокоткање во носот, во ситуации кога не успевате во тоа.
6. Гледајте во темница. Сигурно сте имале ситуација да се разбудите во сред ноќ со потреба да отидете во тоалет или да се напиете чаша вода. И сигурно ве нервирало кога се враќате кон креветот во темница во која очите сеуште не ви се привикнале. Направете го следното – пред да го запалите светлото, покријте го едното око со раката или ставете нешто преку него. Нека биде покриено за целото време додека е светло околу вас. Кога ќе ја изгасите светилката, отворете го окото кое ви беше покриено. Тоа, бидејќи не беше изложено на светлина сеуште има широка зеница и е привикнато да гледа во темница, па така нема да се приближувате кон вашиот кревет во целосен мрак пред вашите очи.
7. Дланката како мерка. Измерете си ја дланката, од врвот на прстите до зглобот кој ја дели дланката од раката и запомнете ја таа мерка. Следен пат кога ќе се најдете во ситуација да немате метро околу вас, нека ви послужи дланката како репер, за да ја утврдите приближно вистинската димензија на она што сакате да го измерите.
8. Одете директно на вашиот кат со лифтот. Како да го направите тоа? Притиснете ги заедно бројот на вашиот кат и копчето за затворање на вратите. Така, дури и во случај кога другите броеви се притиснати, лифтот ќе ве однесе до посакуваниот кат само вас. Ова може да се примени и кога не сакате лифтот да застанува на катови каде е повикан и да собира патници.
9. Проверете го далечинскиот управувач. Кога е слаба батеријата на далечинскиот управувач, непишано правило е дека сите притискаме посилно на копчињата. Но, како да знаете дали истото воопшто функционира или навистина е само до промена на батеријата? Уклучете ја камерата на вашиот телефон и гледајте во екранот, а со далечинскиот управувач “нишанете” кон камерата и кликајте на копчете за уклучување на тв. Ако го видите “infrared” сигналот ќе знаете дека далечинското функционира. Истиот трик можете да го примените и за инфраред сигналот кој го имаат безбедносните камери навечер. Така ќе знаете дали и која камера работи.
10. Пуштете гласно! Ако слушате музика на вашиот телефон и сте ја достигнале максималната висина на звукот, а сакате погласно, ставете го телефонот во длабок сад – со помош на акустиката ќе се добие погласна музика.
11. Бесплатен полнач. Тоа може во Македонија не би профункционирало, меѓутоа ќе ви се најде како совет кога ќе патувате во странство. Ако го изгубите полначот, појдете во некој елитен хотел и на рецепција пожалете се дека кога сте престојувале таму сте го заборавиле полначот во собата. Веројатноста тоа да се случи е многу голема и полначите се на прво место во светот по заборавени нешта во хотелски соби, па елитните хотели располагаат со еден мал милион полначи за да ја надокнадат вашата “загуба”.
12. Најдете ситен предмет од земјата. Ако ви падне обетка или нешто што е исто толку ситно на килимот и не можете да го лоцирате, направете го следново – земете ја правосмукалката и преку цревото замотајте тенка хулахопка. Така ќе го задржите ефектот на вшмукување, но не и повлекувањето на предмети кон кесата за ѓубре во внатрешноста на правосмукалката.
13. Замрзнато Алое Вера. Ставете Алое Вера течност во калапи за мраз и замрзнете ја. Така ќе добиете најефикасна облога при изгореници од сонце.
Дали имате некој “life hack” од вашето секојдневие кој би сакале да го споделите со нас?
Автор: Вања Кочовска
Станете наш facebook фан. Ви Благодариме!