Најшарената продавница во Њујорк

На аголот на 60-тата Улица и 3-тата Авенија, во срцето на Менхетен, е сместена продавницата која ги мами погледите на сите случајни минувачи и дефинитивно претставува подеднакво искушение и за децата и за возрасните. Се работи за познатата “Dylan’s Candy Bar“, во сопственост на Дилан Лорен, ќерката на легендарниот моден дизајнер Ралф Лорен. Инспирирана од познатата книга и филмската адаптација на “Вили Вонка и фабриката за чоколадо”, Дилан со дизајнот на продавницата своите посетители ги воведува во еден волшебен свет, каде децата уживаат, а возрасните се потсетуваат на безгрижноста, радоста и малите нешта кои ги правеле најсреќни кога биле деца. Првата продавница била отворена во 2001 година, а денес таа претставува само една од ланецот продавници низ Америка, “Dylan’s Candy Bar” може да се сретнат во Њујорк, Источен Хемптон, Хјустон, Мајами и Лос Анџелес. Дилан, наследувајќи го талентот и креативниот дух на својот татко, истиот го усмерила во друг правец – дизајнирајќи слатки и чоколади и правејќи ја својата продавница една од омилените во Њујорк. “Dylan’s Candy Bar” во својот разновиден асортиман може да се пофали со околу 7.000 најразлични видови слатки задоволства, тука вклучувајќи ги оригиналните креации на Дилан, ретро слатките карактеристични за 70-тите години на дваесеттиот век и слатките изработени во соработка со М&М бонбоните. Мотото на оваа сезона е “Пролетта е послатка со Dylan’s Candy Bar“.