Жената низ фотографиите на Хајди Лендер

Тргнувајќи од своето детство и гледајќи ја својата мајка како столб на семејството и личен идол, Хајди Лендер (Heidi Lender) ја гради кариерата како професионален фотограф секогаш црпејќи ја инспирацијата од жената, прикажувајќи ја истовремено нејзината грациозност и нејзината улога во семејството и општеството. Хајди работи на многу проекти и добитник е на многу награди, ја сметаат за голем хуманитарец и голем поборник за правата на жените. Од нејзиното портфолио не може, а да не се издвои проектот наречен “She can leap tall buildings” (“Таа може да прескокне високи згради”), во кој самата таа ја игра и улогата на модел. Проект кој ја величи жената, прикажана во контекст на обврските кои традиционално и се припишуваат на неа,а претставени на еден креативен начин.

За овој проект самата Хајди ќе рече: “Јас бев седмо одделение во 1970 година, кога мајка ми се врати на работа. За мене тоа беше трауматично искуство со самото враќање од училиште во празна куќа, како и помислата дека досегашниот најдобар другар наеднаш има други поважни проритети од мене. Мајка ми ја играше улогата на мајка, сопруга, ќерка, работник, независен мислител, хостеса, готвачка, домашен сметководител, тутор на своите деца, одржувач на домаќинството и сето тоа без да дозволи да и се згрутчи маскарата. И самата јас, движејќи се низ мојот возрасен живот и соочувајќи се со тон обврски, започнав не само да ја разбирам мајка ми и нејзината одлука да се врати на работа, туку почнав да ги гледам со големо почитување сите супер-жени во светот, кои успеваат со сите дадени улоги во животот да се снајдат и да бидат добри во тоа, посебно мајка ми која беше неверојатна жена!“.

Не е за бадијала кажаното “Сликата заменува 1000 зборови”, затоа уживајте во галеријата фотографии од оваа талентирана ЖЕНА и одговорете си го прашањето на самите себе си: Која е “супер-жената” во вашиот живот?