ТАА и ТОЈ

Таа е убава. Тој е шармантен. Таа е прецизна. Тој е несериозен. Таа е воркохолик. Тој сака да се излежува. Таа била бубалица. Тој бил седум пати на полагање и обично се снаоѓал. Таа е кариеристка. Тој е невработен. Таа потекнува од угледна фамилија. Тој е дете на разведени родители. Таа е дружељубива. Тој има само тројца пријатели. Таа е строга. Тој е опуштен. Таа живее здрав живот. Тој пуши и пие. Таа гребе грепки на лотарија. Тој игра покер и рулет. Таа спортува. Тој е дебел. Таа го полни фрижидерот во недела. Тој го празни до среда. Таа гледа документарци. Тој игра видео игри. Таа има мачка. Тој понекогаш посакува да ја отруе.

Таа ја обожава сината боја. Тој ги разликува само трите на семафорот и кон нив е апсолутно рамнодушен. Таа обожава чевли. Тој има еден пар патики од прелани. Таа секој втор ден пие кафе со сестра ѝ. Тој со својот брат не се видел осум месеци, го избегнува бидејќи му должи пари. Таа ги знае родендените на сите од фамилијата на памет. Тој до сега четири пати си го заборавил својот. Таа сака цвеќиња. Тој сака зелка и марула. Таа сака да прелистува модни списанија. Тој сака да чита новина додека седи на шоља. Таа посакува, тој барем еднаш да ја изненади со романтична вечера по повод годишнината на нивната врска. Тој секогаш јаде хамбургер пред телевизор на тој ден. Таа сака романтика. Тој мисли дека таа премногу гледа шпански серии. Таа сака масажа под свеќи. Тој го сака задното седиште на автомобилот. Таа сака тивка музика. Тој сака да се откачат на рок журка. Таа сака да се држат за рака додека шетаат. Тој се чувствува истормозен од оваа формалност.

Таа сака тој да ѝ се обраќа со милни зборови. Тој сака да ѝ се обраќа со „Џони„. Таа сака да водат љубов. Тој сака секс. Таа инсистира секогаш во спалната соба светлото да е изгаснато. Тој сака да ужива во секоја несовршеност од нејзиното совршено тело. Таа сака да добива ситни подароци од него како знак на внимание. Тој сака да ја гледа додека таа спие. Таа сака комплименти. Тој сака да ѝ пишува пораки на фрижидерот: „те сакам,дебела„. Таа сака долги разговори по телефон. Тој сака само да слушне дека таа е во ред. Таа понекогаш смета дека тој не ја заслужува. Тој мисли дека е среќно копиле и го смета истото. Таа се залага за моногамна врска, но понекогаш флертува. Тој никогаш не погледнал друга жена. Таа го сака. Tој неа повеќе од себеси…