Веќе неколку сезони по ред, проектот „Џинсоманија“ се реализира како начин на прославување на урбаната култура и тексасот како материјал кој може секогаш одново да се oживее и реинтерпретира. Оваа сезона „Фешн Груп“ во соработка со познатата македонска блогерка Јована Зука изработи капсулна колекција маици, сметајќи дека токму маичките се најдобар партнер на фармерките и останатите производи направени од тексас за современ, едноставен, но шик изглед.
Лимитираната колекција ја сочинуваат неколку модели маици, а секоја од нив пренесува интересна и досетлива порака на македонски или англиски јазик. Пораките се дело на креативната Јована, а дизајнот е на Бојан Тасевски, графички дизајнер во „Фешн Груп“. Маиците ќе бидат претставени преку посебен, интерактивен простор во рамките на Модниот викенд Скопје на 5-ти април во зградата на катната гаража Солунски конгрес. Тие исто така ќе бидат достапни и во некои од продавниците на „Фешн Груп“ за време на викендот 4-ти и 5-ти април.
Дел од претставувањето на маичките е и реализираната фотосесија под наслов „Фармерки, црвен кармин и оваа маичка“, која пренесува ведро, младешко и лежерно расположение. Моделот Ангела Ѓорѓиева од агенцијата Подиум застана пред фото апаратите на тандемот Ани и Дими, за шминка и фризура се погрижи Игор Марков, додека пак стајлингот е на Јована Зука со производи од брендовите во „Fashion&Friends“ и чевли од „BATA“.
Станете наш facebook фан. Ви Благодариме!
