Среќен роденден

Сакав да ти напишам едноставно писмо со едноставна порака за среќен роденден, но едноставноста не е моја јака страна особено кога си во прашање ти. Со самата помисла на тебе нешто се комплицира и овој бел лист хартија како да добива малку боја, а моето срце се исполнува и заживува. Денеска и тоа чуствува дека не е обичен ден, денес е посебно расположено и исполнето со големи желби за тебе. Можеби е несвојствено што тоа мало тело во себе крие толку големо пространство на љубов, но љубовта не познава за граници. Посакав да ја споредам таа моја волја со цела среќа на Земјата, но подоцна научив дека Земјата е неспоредливо мала во вселената и посакав да ја споредам со неа, но и тогаш научив дека и вселената е премала за да ја долови големината на мојата љубов. Престанав да барам тривијални споредби бидејќи сфатив дека ниедна големина не е приближно голема колку љубовта што ја носам за тебе.
Така и моите желби се преголеми и преобемни за да може овој лист хартија да ја долови нивната суштина. Сè на светот е премногу мало во споредба со големините што ти ги носиш во мојот живот, ти си големото парче овошје што ме заситува и ме прави среќна.

Овој ден е со големи букви запишан во календарот на мојот живот, на овој ден непосредно пред да се родам се роди мојата ѕвезда која секој ден го зрачи моето тело. Ти си сон кој го сонувам секоја ноќ кога ќе ги затворам очите и прва помисла кога ќе ги отворам. Секој збор е толку сиромашен и мизерен за да го употребам посакувајќи ти среќен роденден, да имав моќ ќе напишев на небото со големи букви, но и тогаш не би го доловила моментот, ниедна моќ нема да успее да го открие скриеното во мене исто како што никој не успеа да те замени тебе.

Денеска кога ќе ги ги запалиш свеќичките дувни ги сите лоши спомени од минатото. Доволно е само да погледниш напред и да ја видиш иднината пред себе, затоа немој да застанеш на патот по кој чекориш. Осмели се и високо дигни ја главата, под ова небо има место само за најхрабрите, биди храбар и дозволи љубовта да завладее во твоето срце. Силно стегни ме за рака и уште посилно гушни ме, сите проблеми на светот ги снемува токму во тој миг кога си ти до мене. Нема ништо поубаво на светот од миговите кога се будиш на иста перница со личноста што ја сакаш, најтопла е постелата токму со таа личност а утрата се секогаш ведри.

Токму во тоа е големината на животот, во малите мигови кои траат цела вечност. Не знаев дека една запалена свеќа може да разгори толку многу спомени и да разбранува толку многу чувства. Нека тие наши свеќи никогаш не догорат и нека племенот во нас никогаш не се стивне. Сè додека си до мене и додека постоиш секоја ден ќе го славам твојот роденден.

Доколку пишувате проза или поезија и сакате да ја објавите на iLike.mk контактирајте не на contact@ilike.mk | Автор на “Среќен роденден“: Костова Љубица

Станете наш facebook фан.